Kamança ifaçısı Elman Bədəlov.

Kamança ifaçısı Elman Kərim oğlu Bədəlov 4 iyun 1929-cu ildə Ağdam şəhərində anadan olub. “Azərbaycan muğamı ensiklopediyası”nda onun anadan olduğu yer kimi Ağdam rayonu göstərilir. Elman Bədəlovun valideynləri əslən Şuşadan idilər.

Elman uşaqlıqda Ağdam pionerlər evinin üzvü olmuşdur. Burada, o tarda çalmağı və rəsm çəkməyi öyrənirdi. Lakin sonradan Elman özünü kamançada ifaya həsr etməyə qərar verdi.

Elman Bədəlov əvvəlcə pedaqoji texnikumu bitirmişdir, 1943-cü ildə isə Ağdam Dövlət Pedaqoji İnstitutunun fizika-riyaziyyat fakültəsinə daxil olmuşdur. O, həmçinin Ağdam musiqi məktəbində kamançadan dərs deyirdi.

Tələbə ikən, axşamlar Elman Bədəlov Ağdam Dövlət Dram Teatrının orkestrində kamança çalırdı. 1944-1945 və 1947-ci illərdə Elman Bədəlov Respublika olimpiadalarında iştirak etmişdir, 1957-ci ildə isə Bədəlov tar ifaçısı kimi Azərbaycan gənclərinin 2-ci festivalının laureatı olmuşdur.

1951-1957-ci illərdə Elman Bədəlov Qarabağın müxtəlif kəndlərində riyaziyyatdan dərs demişdir.

1957-1961-ci illərdə Elman Bədəlov indiki Azərbaycan Milli Konservatoriyasının nəzdindəki Bakı Musiqi kollecində oxumuş, 1980-ci ildə isə o, indiki Üzeyir Hacıbəyov adına Bakı Musiqi Akademiyasını bitirmişdir.

1958-ci ildən ömrünün sonuna qədər Elman Bədəlov Azərbaycan Televiziya və Radio Xalq Çalğı Alətləri Orkestrinin kamançaçalanlar qrupunun solisti və konsertmeysteri olmuşdur (indiki Səid Rüstəmov adına Azərbaycan Dövlət Xalq Çalğı Alətləri Orkestri).

Elman Bədəlov muğam üçlüyünün tərkibində çıxış etmiş, Yaponiya, Danimarka, İsveç, Norveç və digər ölkələrdə keçirilən beynəlxalq festivallarda iştirak etmişdir.

1982-ci ildə Elman Bədəlova Azərbaycan SSR-in əməkdar artisti adı verilmişdir.

Bədəlov indiki Əhməd Bakıxanov adına 6 saylı uşaq musiqi məktəbində və Bakıda Bülbül adına orta ixtisas musiqi məktəbində, həmçinin Üzeyir Hacıbəyov adına Bakı Musiqi Akademiyasında dərs demişdir. Onun şagirdləri arasında Ədalət Vəzirov, Ağacəbrayıl Abbasəliyev və s. kimi azərbaycanlı kamança ifaçıları var.

1983-ci ildə Elman Bədəlov Səmərqənddə (indiki Özbəkistan) keçirilən Beynəlxalq Muğam simpoziumunda iştirak etmişdir.

Elman Bədəlov 25 iyun 1991-ci ildə Bakıda vəfat etmişdir.