Ağdamda Azərbaycan Yazıçılar Birliyinin üzvü Nazim Muğanlının (Bağırov) 70 illik yubileyi qeyd edilib.

“AğdamTv” xəbər verir ki, 31 oktyabr 2023-cü il tarixdə Ağdam Muğam Mərkəzində Ağdam Rayon İcra Hakimiyyətinin dəstəyi ilə Azərbaycan Yazıçılar Birliyinin üzvü Nazim Muğanlının (Bağırov) 70 illik yubileyi qeyd edilib.

Azərbaycan Respublikasının əməkdar artisti, bədii qiraət ustası Azad Şükürovun moderatorluğu ilə baş tutan tədbirdə Rayon İcra Hakimiyyətinin başçısı Vaqif Həsənov, aparatın əməkdaşları, Azərbaycan Yazıçılar Birliyinin katibi İlqar Fəhmi, YAP Ağdam rayon təşkilatının sədri Mansur Quliyev, şəhid ailələri və qazilər, ziyalılar, ictimaiyyətin nümayəndələri iştirak ediblər. Tədbir Dövlət Himninin səsləndirilməsi ilə başlamış, ölkəmizin ərazi bütövlüyü və suverenliyi uğrunda şəhid olmuş Vətən övladlarının və Ulu öndər Heydər Əliyevin əziz xatirəsi bir dəqiqəlik sükutla yad edilmişdir. Tədbirdə Nazim Muğanlının həyat və yaradıcılığından bəhs edən videoçarx nümayiş etdirilib. Çıxış edən Rayon İcra Hakimiyyətinin başçısı Vaqif Həsənov və digər natiqlər yubilyarın yaradıcılığından və ədəbi fəaliyyətindən geniş söhbət açmışlar.

Tədbirin gedişində Nazim Muğanlının müəllifi olduğu şeirlər səsləndirilmiş, Ağdam Musiqi Kollecinin “Qarabağ” instrumental ansamblının təqdimatında xalq və bəstəkar mahnılarından ibarət musiqi nömrələri və kompozisiyalar tədbir iştirakçılarına təqdim edilmişdir.

Sonda yubilyar çıxış edərək tədbirin təşkilatçılarına və iştirakçılara öz minnətdarlığını bildirmişdir.